Gwardiya nasaypang iro ligsan

CEBU, Philippines - Naangol ang usa ka gwardiya  nga naalaan nga iro human naligsi sa motorsiklo sa  D. Macapagal highway,  Poblacion, dakbayan sa Toledo kagahapon sa sayo sa buntag.

Giila ang biktima nga si Rodulfo Bacasmot, 23, ulitawo, gwardiya sa usa ka lending firm ug lumad nga taga probinsiya sa Camiguin apan kasamtangang nagpuyo sa barangay Poblacion.

Samtang nakaangkon usab og pangos ug gadlas sa kalawasan ang luwan sa motorsiklo nga sila si George Canulibang, 27, Loreto Ugbenada, 53 ug Joneto Tango-an, 26, pulos taga lungsod sa Pinamungajan.

Base sa imbestigasyon nga wala na makabantay ang drayber sa motorsiklo dihang naalaan niini ang gwardiya nga usa ka iro human nagluko og higda sa dalan ug naligsan.

Ang mga sakay sa motorsiklo gikan pa sa lungsod sa Pinamungajan ug padulong motambong sa trabaho sa usa ka construction firm nga nahimutang sa SRP sa dakbayan sa Sugbo.

Daling gidala ang mga biktima sa Toledo City District Hospital human nakaangkon og samad ug pangos sa kalawasan samtang gibalhin sa usa sa mga tambalanan sa dakbayan sa Sugbo ang gwardiya human nagping-it sa kasakit sa iyang tuo nga bahin sa iyang tiil.

Gisuta pa usab kun unsay hinungdan nganong naghigda ang maong gwardiya sa tunga sa dalan.  (BANAT NEWS)