Labangon ug San Roque Duna’y 8 ka adik

CEBU, Philippines - Walo ka kawani sa Barangay San Roque (Ciudad) ug Labangon dinhi sa dakbayan sa Sugbo namatud-an nga adik diay sa gidili nga matang sa drugas.

Ang tanang kawani sa duha ka barangay gipakalitan og drug test sa mga sakop sa City Office for Substance Abuse Prevention (COSAP) tungod sa hangyo sa mga kapitan.

Si Kapitan Victor Buendia maoy mihangyo sa COSAP nga himoan og surprise drug test ang 99 ka kawani sa Barangay Labangon kagahapon sa udto.

Lima sa mga kawani sa Labangon namatud-an nga positibo sa drug test ug nasurpresa pag-ayo si Buendia tungod kay ang duha kanila mga edaran na nga babaye nga tigpanilhig sa karsada.

Gi-interview sa mga reporters, si Buendia miingon nga wala gayud siya magtoo nga ang mao nga mga edaran niya nga mga kawani sa barangay moapil ba diay sa paghingos sa gidili nga matang sa drugas.

Ang laing tulo nga napositibo sa drug test sa Labangon pulos mga barangay garbage collectors.

Gikan sa Labangon, ang mga sakop ni Utlang misirit na usab pag-adto sa Barangay San Roque atol nga ang kapitan nga si Lediore “Boy” Miranda nagsaulog sa iyang birthday.

Ang mga kawani nagtoo lang sa sinugdanan nga sila si Dr. Utlang ug mga kauban miadto lang aron pagtilaw sa kagumkom kaayo nga litson apan diay sila gitagsa-tagsa pag-drug test.

Tulo sa mga lalaki nga kawani sa San Roque napositibo sa drug test. Usa kanila tanod ug ang duha pulos garbage collectors.

Si Kapitan Buendia ug Kapitan Miranda managsama og baruganan nga taktakon nila ang mga napositibo nila nga mga sakop kay dili sila gusto nga makig-uban pagtrabaho sa mga adik nga kawani.  (BANAT NEWS)