6-anyos natagak sa tangke sa tubig nalumos

CEBU, Philippines - Usa 6- anyos nga bata ang napalgang patay human kini matagak ug nalumos sa gi-abandonar nga tangke sa tubig nga adunay pito ka metros nga giladmon nga iya sa lokal nga kagamhanan sa Danao City kagahapon sa buntag sa sitio Tuburan, Barangay Tabok, Danao City.

Ang lawas ni Mark Batulan nadiskubrehan sa iyang paryente nga naglutaw sulod sa tanke sa tubig human kini ma-missing sa miaging gabii. Katapusan kining nakit-an sa amahan nga si Juliano, 50, anang alas 5:00 sa hapon nga naglingkod-lingkod ibabaw sa maong tangke. Matud ni PO1 Joseph Alidon, imbestigador sa Danao City Police Station, nga naghatud pa sa trabahuan ang amahan sa biktima apan pagbalik anang gabii wala na igkita ang bata hinungdan nga gipangita nila kini hangtud midangop na lang sila sa kapolisan nianang alas 8:00 sa gabii aron ipa-blotter ang hitabo.

Sumala pa ni Alidon  gisuwayan sa amahan pagtan-aw ang tangke sa tubig anang gabii apan pakyas ang amahan apan nianang buntag na gisusi kini pagbalik ni Jesus, 42, ig-agaw sa bata ang tangke ug nakita niya kini nga naglutaw na.

Si SPO1 Bryan Batiquin, responding officer sa maong kaso, mibutyag  nga ang tangke adunay tulo ka mga lungag nga wala  taronga og takob. Dugay na kining gi-abandonar human parat na ang mainom nila nga tubig gikan niini. Lakip usab sa reklamo sa mga residente mao nga aduna nay nagkalibang tungod sa tubig nga gikan sa maong tangke.  Aduna sab kini perimeter fence kaniadto apan matud pa nga gipangawat ang gate nga puthaw niini ug karon sulod gawas na lang ang mga tawo. (/EIM)(BANAT NEWS)