Duha ka sikyu namusil, usa ang patay

CEBU, Philippines - Usa ang patay ug angol ang usa ka menor sa managlahing insidente sa pagpamusil diin ang mga suspetsado niini pulos mga security guard.

Wa nay kinabuhi nga naabot sa tambalanan ang drayber sa trak nga si Rodolfo Franco, 40, taga Taloot, Argao, drayber sa trak sa Bright Star Industries human kini gipusil sa gwardiya sa gasolinahan sa sitio Sangi, Calajoan, Minglanilla nga si Charlie Sacopaso,26.

Base sa imbestigasyon nga niadtong Martes sa gabii naglalis ang biktima ug ang gwardya tungod kay namugos si Franco nga mosulod sa gasolinahan bisan og sirado na, matud pa nasuko kini ug gibaharan nga patyon ang suspetsado.

Apan kagahapon sa buntag dihang nagpabulkit ang biktima sa Sangi, Minglanilla, nakit-an kini sa suspetsado ug gipusil sa makatulo ka higayon sa iyang dughan. Patay na kini pag-abot sa Minglanilla District Hospital samtang miikyas ang suspek sa crime scene.

Sa laing pagpamusil, usa ka 17-anyos lalaki ang naangol human maigo sa splinter sa bala dihang gipabuthan kini sa usa ka gwardya sa usa ka bar sa eskina sa dalan D. Jakosalem ug Mango Avenue pasado alas 10 kagahapon sa buntag. Ang suspetsado naila nga si Gleen Culanag, 24, sa CQB Security Agency, taga Paradise Tres sa Pardo.

Matud pa sa suspetsado nga mireklamo ang usa ka tenant sa taas nga bahin sa maong bar tungod kay gisabaan kini kay nagpunay og dukdok sa roll-up ang biktima kuyog sa laing laki ug tulo ka mga babaye.

Dihang gibadlong niya kini nasuko ang maong batan-on ug misuway og dunggab kaniya hinungdan nga gipabuthan kini niini sa ubos apan naigo sa splinter sa bala ang batiis niini.

Naatol nga dunay usa ka polis nga milabay sa maong lugar ug midala kang Culanag sa Homicide Section samtang gidala sa Cebu City Medical Center ang maong batan-on. (BANAT NEWS)