Kawatan miatake atol sa bagyo

CEBU, Philippines - Mga kawatan mipahimulos sa bagyo’ng Basyang atul nga wala na’y mga tawo nga nagsuroy-suroy ug gilungkab nila ang opisina sa tig-ilis og kwarta didto sa dalan A.S. Fortuna, barangay Banilad sa dakbayan sa Sugbo.

Base sa imbestigasyon sa Theft and Robbery Section sa Cebu City Police Office (CCPO) walay gwardya ang AHE Manpower Trading Foreign Exchange panahon sa gabii.

Si Joseph Piguez nga maintenance worker sa mao nga opisina mitug-an sa kapolisan nga siya ang mi-drive sa sakyanan sa iyang agawon nga si Allan Hernandez dihang nahitabo ang pagpanglungkab.

Ang mga kawatan miguba sa barandilya sa bentana ug dayon ang sliding window sa opisina.

Nadala sa kawatan ang tulo ka Central Processing Unit (CPU) sa computer, duha ka monitor, unom ka speaker, ug ang duha ka relo ni Hernandez ug ang wala pa mabana-bana nga kantidad sa kwarta. Giapil pa pagkuha sa kawatan    mao ang P3,500 nga kuwarta ni Piquez ug ang iyang long sleeve nga gisulod sa iyang locker ug ang P3,050 nga kuwarta sa iyang kauban.

Gikuha usab sa kawatan ang 9 mm nga pistola sa gwardya nga si Berandal Canales, 23, nga iyang gibilin sa opisina human sa iyang duty nianang gabhiona.  (BANAT NEWS)