DepEd mang-enroll na sugod Enero 25

CEBU, Philippines - Sugod  sa Enero 25 mang-enrol na ang  Department of Education  (DepEd) sa  mga  estudyante  nga motungha sa Hunyo  ning  tuiga.  Matud pa ni Elivira Bongosa sa Philippine Information Agency-7 (PIA-7) nga si Education Secretary Armin Luistro misulti nga tuyo nilang malikayan ang  unsa  mang  problema sa dili pa buksan  ang  klase sa mga estudyante.

"We want to prevent logistical problems when the new school year starts in June.”

Miingon  si  Luistro  nga  mas  maayong  masayran  daan  sa  mga  magtutudlo ang  gidaghanon  sa ilang  mga  estudyante sa  dili  pa ang  pagsugod  sa  klase aron matagan-an  usab  og  tukmang  gidaghanon  sa lingkoranan  ug  teaching  materials.

   Dugang pa ni Bongosa nga tumong sa maong sayo nga enrollment mao nga masiguro ang mga batang 5-anyos para  sa  kindergarten, samtang  ang  mga  6 anyos alang  sa  Grade 1 sa umaabot Hunyo.

Gipadayag ni Bongosa nga ang ubang tuyo   sa early registration mao ang mga out-of-school children (OSC) ug out-of-school youth (OSY) gikan sa mga kabus  ug  sa mga street children nga nagpangedaron og 5 hangtud 18 ka tuig.  (BANAT NEWS)