Ceres bus nalimbuwad, 2 patay

CEBU, Philippines - Patay ang usa ka inahan ug ang iyang anak nga batang babaye human malimbuwad ang ilang gisakyan nga Ceres bus sa barangay Balhaan sa lungsod sa Badian pasado alas 7:00 kagahapon sa buntag.

Ang maong inahan naila nga si Marilyn Gerson, 41, ug ang iyang anak naila nga si Geralyn Gerson, 5, molupyo sa barangay Wireless sa dakbayan sa Mandaue.

Samtang ang drayber sa maong bus naila nga si Erwin Gerson, 42, molupyo sa   Wireless sa dakbayan sa Mandaue, bana sa namatay nga si Marilyn ug amahan ni Geralyn Gerson.

Ang mga angol nga gidala sa Badian District Hospital mao sila si  Aida Javierto, 47; Cepriana Cuevas, 46; Renan Letigio, 23; Jimmy Noste, 42; Edwin Batomalaque, 19; ug Rosell Zamora, 27, molupyo sa lungsod sa Alegria; Lourdes Bendulo, 63 ug ang iyang bana nga si Marcio Bendulo, 71, molupyo sa lungsod sa Madridejos ug si Alever Asma, 27, gikan sa lungsod sa Moalboal.

Gidala sab sa Alegria District Hospital sila si Jorgen Devila, 19; Melrose Gomez; Prescilla Sanchez, 62, ug  Isidro Manaba molupyo sa Legaspi Alegria, ug Alan Clifford Durano sa Langasil Alegria, Maricris Gomez, sa  lungsod sa Alegria; sa Malabuyoc; Melita Aballe ug Marilou Malaylan. Prescila Sanchez sa Poblacion Alegria, Alden Arnejo, Sta Felomina Alegria, Mariano Endab, Ginatilan. Ang Ceres Bus nga may plate number 722 CEH gikan sa Moalboal padung sa Cebu City niadtong tungora.

Matud pa ni PO1 Apollo Concepcion, desk officer sa Badian Police Station nga nasuta sa ilang imbestigasyon nga positibo sa liquor test ang maong drayber.

Sumala pa ni Concepcion nga ang maong bus kusog nga nagdagan dihang nahitabo ang maong aksidente. Pag-abot sa barangay Badhaan nawad-an na og control sa manobela ang drayber pag-abot sa lugsongon ug kurbadahon nga bahin sa karsada hangtud nga kini nalimbuwad ug naigo sa kilometer post kilid sa karsada.

Si Concepcion miingon nga matud pa sa drayber nga nakatamak pa siya sa brakes sa kurbadahon nga bahin apan wala na gyud kini madala pa hangtud nga natumba ang bus.

Wala modagan ang drayber matud pa ni Concepcion ug didto lang ni sa duol sa bus apan wala ni magpaila nga siya ang drayber tungod kay nahadlok siya nga kulatahon sa mga tawo.

Sumala pa ni Concepcion nga dihang gisukit-sukit ang drayber di na halos motingog tungod sa nahitabo sa iyang asawa ug anak.  (BANAT NEWS)