Minors gidala sa kagawad sa motel

CEBU, Philippines - Padayon pa ang pagpangita sa kapolisan sa Mandaue City Police Office (MCPO) sa usa ka barangay konsehal sa Cambaro nga gipasanginlan sa lima ka minor de edad nga tinun-an nga babaye ug lalaki nga gidala sa sulod sa motel sa reclamation area nga ilang naluwas kuyog sa mga ginikanan niini.

Si SPO3 Marcos Noval, imbestigador sa IDMB sa MCPO nga nahinabi sa Banat News miingon nga nahidangat ang usa sa mga ginikanan sa mga bata nga nangayo og panabang kanila sa pagluwas sa ilang anak sa sulod sa Moonlight Inn nga usa ka motel sa reclamation area kay gidala sa barangay konsehal (pangan gipugngan hangtud di mapasaka ang kaso) sa Cambaro sa maong motel.

Ang team sa IDMB nga nahidangat sa maong motel maoy nagpagawas sa upat ka minor de edad nga nanarangka sa sulod sa CR apan nakasibat na ang konsehal ug ang kauban niini. Dugang pa ni Noval nga sa ilang imbestigasyon nga giingong gipainom og ilimnong makahubog sa maong kagawad ug sa kauban niini ang mga minor hangtud nga nangahubog.

Usa sa mga dalagita ang mibutyag nga gipasaka siya sa kagawad sa kwarto apan nagpasumangil siyang mag-CR ug diha na misunod ang ilang mga kauban ug nanarangka sa kasilyas ug nagsinggit-singgit pagpangayo og tabang.

Usa sa mga biktima ang mi-text sa iyang ginikanan ug nangayo og tabang hinungdan sa pagresponde sa mga polis.

Si Senior Inspector Mercy Villaro nga maoy hepe sa Women’s Section sa MCPO nga nahinabi sa Banat News miingon nga bisan kun gipadayag sa mga biktima nga wala sila ka pahimusli  ilang pagkababaye apan sa gihapon ilang gihimo ang pagpaubos kanila sa medical check up.

Dugang pa ni Villaro nga dugang nilang himoon ngadto sa mga biktima mao ang pagpaubos usab kanila sa psychological check up sa pagsiguro sa kahimtang sa ilang panglawas.

Subay sa RA 7610 gidili sa balaod ang pagdala og mga menor de edad sud sa mga balay kahilayan sa dili nila ig-unsa o paryente.  (BANAT NEWS)