Suspek sa pagpusil patay sa vendor sa Carbon, nadakpan

CEBU, Philippines — Nadakpan sa kapolisan ang usa ka 37-anyos nga lalaki nga giingong suspek sa pagpamusil nga miresulta sa pagkamatay sa usa ka 41-anyos nga lalaki sa atubangan sa Enterim Building, Carbon Public Market, Barangay Ermita, Cebu City, niadtong Septiyembre 19, 2026.

Ang pagpamusil nahitabo alas 11:50 sa gabii, sumala sa Cebu City Police Office (CCPO). Ang biktima nga giila sa kapolisan pinaagi sa alyas “Ronaldo,” 41, residente sa Sitio Pig Vendor, Barangay Ermita.

Ang suspek nga giila nga si alyas “Ronron,” 37, residente sa maong lugar, giingong maoy mipusil sa biktima.

Human sa insidente, gilusad dayon sa Police Station 5 (PS5), City Intelligence Unit (CIU), City Intelligence and Detective Management Unit (CIDMU), ug City Drug Enforcement Unit (CDEU) ang follow-up ug hot pursuit operations hangtod nga nitahan ang suspek niadtong Septiyembre 20 sa gabii.

Giandam na sa kapolisan ang mga dokumento alang sa pagsaka sa angay nga kasong criminal batok sa suspek.

Wala sab narekober sa kapolisan ang armas nga giingong gigamit sa pagpamusil tungod kay giingong gilabay kini sa suspek ngadto sa dagat.

Samtang, sumala sa asawa sa biktima, nagduda siya nga ang pagpamusil may kalabotan sa giingong pagkalambigit sa iyang bana sa ilegal nga droga.—  IBM BANAT NEWS