Pugante gikan sa Tacloban City nakaabang na og apartment

CEBU, Philippines - Nasikop sa kapolisan sa Presinto 1 sa Mandaue City Police Office (MCPO) ang usa ka eskapo gikan sa bilanggoan sa dakbayan sa Tacloban atol usab sa paghapak sa super typhoon Yolanda niadtong Nobiyembre 8 niining tuiga.

Ang nadakpan ug temporaryo karon nga gibalhog sa detention cell sa Presinto 1 mao si Patrocenio Raya, 35, nga taga Magallanes, Tacloban City.

Si PO2 Jesson Estrera sa kapolisan sa nahisgutang presinto nga nahinabi sa Banat News miingon nga unang nadawat nila ang kasayuran gikan sa wala magpaila nilang impormante labot sa usa ka inmate sa Tacloban City nga naabot dinhi sa Sugbu.

Ang maong eskapo nag-abang kini og apartment sa sitio Maharlika sa barangay Subangdaku sa maong dakbayan nga maoy nakaaghat kanila sa paghimo og pakisusi.

Dugang pa ni PO2 Estrera nga dihang ilang nakita ang gitumbok nga nakaeskapo sa dakbayan sa Tacloban ilaha kining gisukitsukit sa pagkatawo niini.

Si Estrera miingon nga giangkon hinuon ni Raya ang iyang pagkabinilanggo sa dakbayan sa Tacloban tungod sa kaso sa ilegal nga drugas.

Matud pa ni Estrera nga si Raya mitug-an nga nahidangat siya sa dakbayan sa Lapulapu niadtong miaging adlaw nga usa sa mga sakay sa C130 nga nagdala usab og mga bakwit gikan sa dakbayan sa Tacloban.

Si Estrera miingon nga wala na hinuon motug-an ang maong eskapo nga binilanggo sa dakbayan sa Tacloban kun diin kini og kuwarta nga iyang gipang-abang og apartment.  (BANAT NEWS)