Negosyante gipusil patay

CEBU, Philippines - Usa ka negosyante ang gipusil patay sa wala pa mailhing lalaki samtang nag-atiman sa usa ka kustomer sulod sa iyang tindahan sa barangay Tuyan sa dakbayan sa Naga kagahapon sa buntag. Ang biktima naila nga si Renante Bacus, 39, tag-iya sa Bacus Construction Supply diha sa barangay Tuyan sa dakbayan sa Naga.

Nakaangkon og daghang samad pinusilan sa iyang ulo ang biktima nga maoy hinungdan sa hinanaling kamatayon niini. Ang suspetsado gihulagway nga nagsul-ob og bonnet, nag-jacket ug nagsul-ob og blue nga shorts.

Wala na madala sa tambalanan ang biktima nga gideklarar nga patay sa mga paramedics. Ang kapolisan padayon pa sa pagsusi sa motibo sa maong pagpamusil.

Si SPO2 Ian Quitayin nga nahinabi sa The Freeman/Banat News, ang imbestigador sa kaso miingon nga si Bacus nag-atiman sa iyang kustomer sa alas 8:30 sa buntag dihang miabot ang usa ka lalaki nga nagsakay og motor.

Matud pa nga misulod sa tindahan ni Bacus ang suspetsado ug mipusil niini sa makapila ka higayon. Gikuha pa sa suspetsado ang pitaka sa biktima ug mipabuto makausa ka higayon dayong biya sa tindahan ug gilabay ra pud niini ang maong pitaka pipila ka metros gikan sa tindahan.

Nakarekober og duha ka basiyo sa kalibre .45 nga bala diha sa crime scene.  Matud ni Quitayin nga nakakuha og video footage ang closed-circuit television camera sa maong lalaki nga nagpakitang hanas kini sa pagpatay. (BANAT NEWS)