Heroe’s welcome sa 129 sakop sa rpsb-7
CEBU, Philippines - Gihatagan og hero’s welcome ug medalya ang mga sakop sa Regional Public Safety Battalion 7 nga gikan sa dakbayan sa Zamboanga kagahapon sa buntag.
Si Regional Director sa PRO-7 Chief Supt. Danilo Constantino mihulagway kanila nga bayani tungod sa dakong natampo sa seguridad ug kalinaw sa Zamboanga City atol sa pag-atake sa Moro National Liberation Front ug sa Jolo, Sulu atol sa eleksyon.
Miingon si Constantino nga ang mga magtutudlo sa Jolo wala mo-serve niadtong eleksyon tungod sa kahadlok hinungdan nga ang mga sakop sa RPSB-7 maoy nagsilbing Board of Election Teller sa maong lugar.
Medalya ng Kagalingan ang gihatag sa 129 ka mga polis gikan sa 130 ka mga sakop nga gipadala didto, ang usa kanila mi-uli dinhi sa Sugbu nga wala’y pagtugot sa ilang labaw. Ang midawat niini ang Battalion Commander sa RPSB-7 nga si Supt. Clifford Gairanod, ang lain pang tulo ka mga polis ang midawat sa medalya alang sa ilang unit.
Agi og pahalipay, gitugutan silang makabakasyon og usa ka semana aron makauban nila ang ilang pamilya nga nalayo kanila og kapin duha ka buwan.
Gisugat sila sa ilang mga pamilya uban sa mga opisyal ug mga empleyado sa PRO-7. Lakip sa misugat mao ang asawa ni PO1 Denie Tamiya nga si Fatima ug sa ilang 5-anyos nga anak.
Ang duha, usa palang ka tuig gikan nagminyo, si PO1 Tamiya daling migakos sa iyang pamilya ug nakighugoy-hugoy sa ilang anak nga si Zaph Dashien.
Samtang dako sab kaayo ang kalipay ni Karen Rose Lantaka nga mihalok sa iyang bana nga si PO1 Regilio Lantaka atubangan sa mga sakop sa media tungod sa iyang kalipay ug kamingaw sa bana.
“Nalipay syempre kay naa baya mi bata, naghuna-huna ko basig naunsa sila didto,†sumala ni Karen Rose.
Matud pa ni PO1 Lantaka nga dako kaayo niyang kalipay nga nakauli na siya nga wala’y dautang nahitabo kaniya didto sa Zamboanga ug sa Jolo, Sulu.
Gitapos ang maong selebrasyon pinaagi sa usa ka boodle fight ug gipailawom dayon sila sa stress debriefing una sila gitugotan makauli sa ilang tagsa-tagsa ka pamilya.
Samtang imbestigahon si PO1 Niñonito Dahilig tungod sa pagpugos niini og pauli sa Sugbu bisan wala siya tuguti sa iyang labaw. Giingong miuli siya sa wala pa sila i-deploy sa Jolo ug wala na mobalik didto. (BANAT NEWS)
- Latest
