Text bahin sa kusog sa linog di patuohan
CEBU, Philippines - Gimando ni Gobernador Hilario Davide III sa probinsya sa Sugbo ngadto sa publiko nga dili motuo sa mikatap nga mga text messages labot sa giingong laing kusog nga linog nga moigo sa Central Visayas.
“Ayaw kamo pagtuo anang mga text messages nga madawat ninyo nga aduna na poy linog muabot aning orasaha. Dili na tinuod," kini matud pa sa gobernador.
Sa nasayran, ang mga text message nga may umaabot nga magnitude 8 nga linog moigo sa probinsya sa Bohol ug sa Cebu sa dili madugay.
Miingon si Davide nga maghatag kini og dakong kabalaka ug kahadlok sa publiko. Gipasabot ni Davide nga kining maong text message mini, kay wala may bisan kinsa nga makapamatuod o makatagna nga adunay moabot nga makusog nga linog.
“Let’s all remain calm and continue to pray,†kini dugang pa ni Davide.
Samtang si Neil Angelo Sanchez, officer-in-charge sa Provincial Disaster Risk Reduction and Management Council (PDRRMC) miawhag usab sa mga Sugboanon nga dili tagdon ang bisan unsang mokatap nga mga text messages.
“Ignore this text. Do not pass it forward. Let’s just be prepared amidst the ongoing aftershocks. Circulating such messages will not help and only cause panic, kini butyag pa ni Sanchez.
Si Sanchez nagkanayon nga ang publiko kinahanglang mokuha lamang og impormasyon gikan sa mga opisyal nga ahensya sama sa Philippine Institute of Volcanology and Seismology (Phivolcs). (BANAT NEWS)
- Latest
