Duha nakalas sa aksidente

CEBU, Philippines - Duha ka mga tawo ang nakalas sa duha ka managlahing aksidente sa kadalanan sa lalawigan sa Sugbu sa miaging adlaw.

Ang 65-anyos nga biktima naila nga si Crisanta Argallon Ostria, lumolupyo sa barangay Sta. Cruz sa lungsod sa San Francisco.

Samtang ang nakabangga kaniya naila nga si Michael Saman Luzon, 22 anyos, residente sa sitio Igot, barangay Esperanza sa lungsod sa San Francisco.

Base sa imbestigasyon sa kapolisan nga milabang ang biktima sa alas 2:45 sa hapon sa miaging adlaw sa barangay Sta. Cruz apan nabanggaan kini sa motorsiklo nga gimaneho sa biktima nga nagdala sa plate number nga HJ 7128.

Gidala sa Ricardo Maningo District Hospital ang biktima apan nakabsan kini sa kinabuhi samtang gibiyahe aron ibalhin og tambalanan sa Cebu City.

Samtang patay usab ang usa ka 25-anyos nga si Jimar Cataag human kini magkadinasmagay sa laing motorsiklo sa miaging adlaw sa sitio Tingkoro sa barangay Pakigne sa lungsod sa Minglanilla.

Matud pa nga nagkasugat gyud ang duha hinungdan sa naangkon nilang grabeng kadaot sa kalawasan apan mas nagrabehan si Cataag nga nakaingon sa iyang kamatayon.

Samtang ang drayber sa laing motorsiklo nga si Isidro Sanchez, 22, nga usa ka habal-habal driver naangol usab apan luwas na ang kahimtang.

Nasuta nga ang duha pulos wa magsuot og helmet ug parehong nakainom. (Bryner Diaz/EIM)

Cardinal Vidal nakagawas na sa tambalanan

Nauli na diha sa iyang balay sa Sto. Niño Village sa barangay Banilad ning dakbayan si Cebu Archbishop Emiritus Ricardo Cardinal Vidal gikan sa pagka-confine sa tambalanan sa milabay’ng semana.

Base sa report sa Aksiyon Bisaya nga maayo na ang kondisyon sa panglawas sa kanhi Arsobispo sa Sugbo apan bisan pa niini padayon gihapong gi-monitor sa mga espesyalistang doktor ang kahimtang sa iyang panglawas.

Si Vidal giingong nakasinati og mild stroke niadtong milabay’ng semana sa Martes sa gabii maong dali siyang gidala sa Perpetual Soccuor Hospital.

Si Vidal mapasalamaton kaayo sa mga tanang nag-ampo alang sa iyang hingpit nga pagkaayo.

Gidid-an una siya nga mahago sa iyang mga gimbuhaton sa simbahan aron maka-recover ang iyang lawas. (/EIM) (BANAT NEWS)