Kanhi libudsuroy nga nahimong polis napiling Most Outstanding Model PNP

CEBU, Philippines - Usa ka polis nga nadestino sa Police Communication Relation sa Cebu City Police Office (CCPO) napiling Most Outstanding Model PNP sa tibuok nasud.

Si SPO2 Emigdio Felisan kinsa 23 na ka tuig sa serbisyo giingong usa ka kanhi badlongon sa katilingban sa wala pa kini masulod pagka-polis.

Base sa report sa Balitang Bisdak si Felisan aktibo kini sa pagtabang ilabi na sa kabataan nga makalapas sa balaud.

Si Felisan giingong usa ka libudsuroy ug nasikop usab kini kaniadto ug bisan pa sa kangil-ad sa iyang mga kasinatian wala kini mawagtangi sa paglaom nga mausab ang dagan sa iyang kinabuhi ubos sa iyang pagpaningkamot ug pagpursige.

“Sakit kaayong paminawon nga kaming mga bata kaniadto gitawag mi og mga tuyom kung imong huna-hunaon ang tuyom tunok….sa ato pa ang mga kabataan kaniadto mga tunok sa katilingban medyo na-encourage ko nga ipakita nga kining mga bataa karon dili ni sila mga tunok,” ni Felisan pa sa maong report.

Nagtuo si Felisan nga ang kabataan bisan unsa ka badlungon dunay tsansang mamahimong mapuslan sa katilingban pinaagi sa pag-agak sa mga ginikanan ug sa komunidad.

Si Felisan sulod na sa 20 ka tuig nga naminyo sa iyang asawa nga si Myrna ug duna sila’y tulo ka mga anak ug aktibo sila sa mga kalihukan sa simbahan sa lungsod sa Consolacion diin usab sila nanimuyo.

Si Felisan kinsa gi-nominate sa duha ka mga pari diha sa ilang lungsod napili usab kining Most Outstanding Policeman niadtong tuig 2008 ug kapin na sa 100 ka mga commendation ug recognition ang iyang nadawat.

Karon gawas sa plaque si Felisan nakadawat usab kini og P50,000 nga iyang gamiton og pagpatukod og kapilya diha sa ilang dapit. (/EIM) (BANAT NEWS)