KBP officials malaumong maabswelto ra si Lastimosa
CEBU, Philippines - Atol sa selebrasyon sa buwan sa Kapisanan ng mga Brodkaster ng Pilipinas kon KBP nga pormal nga gibuksan kagahapon, ang mga kadagkoan sa maong kahugpongan masaligon ug nagtuo nga maabswelto ra sa iyang kaso ang beteranong journalist ug broadcaster nga si Leo Lastimosa nga gikombikto sa kasong libelo nga gipasaka ni kanhi gobernador ug karon kongresista sa ikatulong distrito Gwendolyn Garcia.
Matod ni kanhi chairman sa KBP ug karon DYHP Station Manager Atty. Ruphil Banoc nga nagtuo siyang bakwion sa Court of Appeals o ba kaha sa Korte Suprema ang hukom kang Lastimosa.
Gitandi ni Banoc ang kaso ni Lastimosa sa beteranong magsisibya ug manunulat nga si Luis Beltran ug anhing Max Soliven sa igsuong pamantalaan sa Banat News nga The Philippine Star.
Ang duha gipasakaan usab og kasong libelo ni kanhi presidente Corazon “Cory†Aquino ug gikombikto sa Regional Trial Court didto sa kaulohan apan gibasura kini pag-abot sa Court of Appeals.
Matud ni Banoc nga di angay mahadlok ang mga brodkaster ug mga tigbalita ug mas angayan nga ipadayon ug magmadasigon sa ilang trabaho.Dugang pang Bañoc, ang Batakang Balaod migarantiya sa kagawasan sa pagpadayag ug sa media.
Samtang ang chairman sa KBP nga si Marlon Baula mipasalig nga ang tibuok pwersa sa KBP kanunay nga mopaluyo ug mosuporta ngadto ni Lastimosa sa iyang pagkab-ot sa kamatuoran ug hustisya.
Gihagit usab ni Basilica Minore del Santo Niño Rector Fr. Jonas Mejares, OSA ang media nga dili sundon ang tawong hipokrito, panalipdan ug barugan ang kamatuoran bisan mangahulogan kini og pag-antos sa mga magsisibya.
Usa sa mga highlights sa selebrasyon mao ang Mr. and Ms KBP pageant. Si Karol Monique De Leon ug Jonathan Cimafranca sa ABS-CBN maoy misungkit sa kadaogan ug sila maoy morepresentar sa piniliay unya sa Mr. and Ms. Press Freedom karong umaabot nga Septiyembre 14. (BANAT NEWS)
- Latest
