Nagmaoy nakuhaan og shabu

CEBU, Philippines - Usa ka hubog nga nagpatuyang nga giingong nanghagis ang gipadakop sa mga silingan ug nakuhaan hinuon pipila ka putos sa ginadiling drugas  diha sa barangay Talangnan sa lungsod sa Madredijos isla sa Bantayan niadtong miaging alas 4:00 sa hapon.

Ang suspek mao si Herole Villacrusis Alyas Rara, 46, molupyo sa barangay Mansilang, Madredijos.

Matud ni PO2 Jeffrey Barco, imbestigador sa Madridejos Police dihang nahinabi sa Banat News gi-alarma kini sa mga molupyo sa lugar tungod sa kahubog ug pagpanghagis sa lugar.

Sa pag-responde nila ni PO1 Rex Michael Pusi ug PO1 Glowil Pasquite giingong misukol kini pinaagi sa pagtukmod kang Pasquite hinungdan nga gitabangan siya og layog sa mga polis aron makontrolar.

Dihang ilang gikapkapan nakuha gikan sa iyang bulsa ang duha ka paketeng gidudahang shabu.  (BANAT NEWS)