Samsam maoy asst. maj. floor leader sa kongreso

CEBU, Philippines - Si Kongresista Gerald Anthony “Samsam” Gullas sa unang distrito  sa lalawigan  sa Sugbo mipadayag sa iyang kalipay nga napiling assistant majority floor leader sa Kongreso.

Sa gipahigayong press conference kagahapon didto sa University of the Visayas (UV) main campus gibutyag sa batan-ong kongresista nga nagpahigayon na og election sa Kongreso alang sa mga mahimong miyembro sa komitiba.

Matud niya nga daku kaayo ang iyang kalipay tungod kay isip usa ka neophyte nahimo siyang miyembro sa Committee on Rules ug nahimong assistant majority floor leader.

Gibutyag ni Samsam nga mihangyo usab siya nga mahimong miyembro  sa ubang mga komitiba diin alang sa neophyte sama kaniya maglisud gyud og sulod niini .

Apan gihangyo niya ang iyang apohan nga si kanhi Kongresista Eduardo Gullas nga tabangan siyang makasulod sa mga komitibang iyang gipili.

Apan wala pa ibutyag ni Samsam kung unsa nga mga komitiba   ang  iyang  nagustohang  pasakopan. Gawas niini gibutyag ni Samsam ang unang kasinatian niya  didto sa Kongreso diin matud niya nga gibati usab siya og kakulba.

Miingon  si Samsam nga kinahanglan pa niya ang dugang  pagtuon aron makakat-on  tungod kay duna siyay banggiitan  kaayong magtutudlo nga mao ang iyang apohan nga si kanhi Kongresista Gullas. (/WC) (BANAT NEWS)