77 ka opisyal sa polis apektado sa lahugay

CEBU, Philippines - Mga 77 ka  opisyal sa polis sa Central Visayas ang ipaubos sa lahugay sa Police Regional Office (PRO)-7. Ang maong lahugay  may  labot  sa Human Resource Development Program sa kapolisan.

Giingong 61 ka mga opisyal nga nagranggo og senior inspector ug 16 ka  nagrangko og inspector ang maapektohan sa lahugay.

Si Senior Superintendent Edward Caranza, hepe sa directorial staff miimplementar dayon sa kamanduan ni Police Regional Director, Chief Superintendent Marcelo Garbo.

Sa iyang bahin, si Garbo nagkanayon nga ang maong lahugay   kaniadto pa unta kini i-implementar sa wala pa ang eleksiyon sa Mayo niining tuiga apan napakyas sila tungod sa ilang pagpahigayon og preparasyon sa  piniliay.

Base sa record  sa PRO-7, 14 ka mga polis gikan sa Cebu Provincial Police Office (CPPO), 13 gikan sa Bohol Provincial Police Office (BPPO), 10 gikan sa Negros Oriental Provincial Police Office (NPPO), siyam gikan sa Lapu-Lapu City Police Office (LLCPO), unom gikan sa Cebu City Police Office (CCPO) ug duha gikan sa Siquijor Provincial Police Office (SPPO) ang maapil sa lahugay.

Ang lahugay ipaubos kini sa tulo ka mga batches. Ang mga polis nga malakip  sa lahugay mao  kadtong mikapin  na sa three-year term sa ilang posisyon ug nadestinohan nga buhatan.

Si Garbo nagkanayon usab kini nga ang localization program sa PNP haom lang kini ngadto sa Non-Commissioned Officer (PNCO) ug dili sa mga opisyal.

Nunot niini, si Deputy Regional Director for Administration, Chief Superintendent Samuel Yordan  nabalhin na ngadto sa Camp Crame isip director sa Headquarters Service Support Group.

Apan ang higher headquarter wala pa makahukom kung kinsay ipuli kang Yordan. (Brenda D. Batuto ug Ria Mae Y. Booc sa The Freeman/WC) (BANAT NEWS)