One Cebu mayors nakigkita ni Gov. Davide
CEBU, Philippines - Nakigtagbo kang Gob. Hilario Davide III kagahapon ang napulo ka mayor nga sakop sa One Cebu Party aron pagpadayag sa ilang suporta sa bag-ong administrasyon.
Ang mga mayor mao sila si Valdemar Chiong sa dakbayan sa Naga, Ronald Alan Cesante sa Dalaguete, Nicomedes delos Santos sa Alcoy, Ronald Guarin sa Oslob, Mariano Blanco III sa Ronda, Inocentes Cabaron sa Moalboal, Dean Michael Singco sa Ginatilan, Robburt Librando sa Badian, Lito Narciso Creus sa Malabuyoc ug Bise Mayor Augustus Caesar Moreno sa Aloguinsan nga nagrepresentar sa iyang asawa nga si Mayor Cynthia Moreno.
Sila gikuyogan nilang Argao Mayor Edsel Galeos ug Bokal Peter John Calderon kinsa mga kaalyado ni Davide sa Liberal Party.
“Salamat kaayo nga nasuroy mo sa Kapitolyo,†matud pang Davide ngadto sa mga mayor. Gipadayag sa mga mayor ang nagkalainlain butang nga nagkinahanglan sa ayuda sa Kapitolyo.
Gipahibawo ni Davide si Guarin sa iyang pagbisita sa tambalanan sa maong lungsod hinungdan nga gidapit usab ni Creus ang gobernador sa pagbisita sa tambalanan sa lungsod sa Malabuyoc.
Si Singco mihangyo nga mabutangan og medical technologists ang mga tambalanan sanglit ang mga doktor dili na moresita og tambal kung dili pa mapaubos sa pakisusi sa laboratory ang pasyenti aron dili mausik ang tambal nga ilang iresita.
Pakigtagboan ni Davide ang mga pangulo sa mga tambalanan aron mahisgutan ang ilang mga problema isip usab pagpangandam sa paghimo sa budget alang sa sunod tuig.
Samtang gipasalig ni Davide nga alagaran niya ang tanan human nangutana si Creus kung unsay iyang pagtagad sa mga mayor nga mga sakop sa One Cebu.
“Kung alang sa kaayuhan, we will help each other,†matud pang Davide. Samtang giklaro usab ni Davide nga wala pa siya’y plano sa kontrobersiyal nga luna sa Balili human nangutana si Chiong.
Gipasabot ni Davide nga ang maong luna ebidensiya pa sa kaso nga giatubang karon ni kanhi gobernador, Kong. Gwendolyn Garcia, nga ana sa Sandiganbayan.(Gregg M. Rubio/EIM) (BANAT NEWS)
- Latest
