Lalaki gipusdakan og bato sa ulo patay

CEBU, Philippines - Napigsat ang ulo sa usa ka 32-anyos nga lalaki nga gituohang gitabangan og patay sa iyang mga kontra samtang paingon na unta kining mopauli gikan mitambong og disco atol sa kapistahan sa Sityo Canotse sa barangay Campo lungsod sa San Francisco sa isla sa Camotes niadtong Domingo sa alas 8:00 sa buntag. Ang biktima mao si Charlito Narte,32, molupyo sa nahisgutang lugar samtang sa paghimo ning balita wala pay natumbok nga suspek ang kapulisan.

Ang amahan sa biktima nga si Candelario maoy nakakita sa patay’ng lawas sa anak nga nagkadugo ug nagbuy-od na sa dalan.

Matud pa padung na pauli ang amahan ug naagi sa maong lugar dihang nabantayan niini ang patay’ng lawas nga sa iyang pagsusi iyaha diay anak apan napusa na ang ulo.

Sa pagresponde sa kapulisan nasuta,  gituohang gidakdakan og bato  ang ulo sa biktima ug dunay bato sa crime scene nga nagkadugo.

Gidudahan sa kapulisan nga dili lang usa ka tawo ang mipatay sa biktima tungod sa kadaghan sa mga bun-og nga naangkon niini.               

Katapusang nakit-ang buhi ang biktima diha sa disco tungod sa kapistahan sa barangay Campo.

Gidudahang nakakita kini og bikil sa maong barangay ug posibleng giatangan kini sa iyang pagpauli. (BANAT NEWS)