Bana patay sa asawa

CEBU, Philippines - Patay ang usa ka pintor human kini giunay sa pagpusil sa iyang asawa tungod sa tumang pangabubho sa ginang ngadto sa  bana diha sud sa ilang balay sa sitio Cambiohan, barangay Marigondon, dakbayan sa Lapulapu alas  8 pasado ang takna sa miaging gabii.

Si SPO1 Allan Pantaleon sa Homicide Section miila sa namatay nga mao si Samuel Sollano, 37, samtang ang suspek mao si Aida Sollano, 26, nga asawa sa biktima.

Matud pa ni Pantaleon nga nangabubho ang asawa ngadto sa bana tungod kay kanunay na kining gabii na kaayong mouli.

Dugang pa niini, nasakpan usab sa suspek nga daghang gitagoang sim pack ang bana nga gidudahan niyang maoy gigamit niini sa pagpamabaye.

Atol sa pag-abot sa biktima gikomprontase kini dayon sa suspek atubangan sa ilang anak.

Matud pa ni Pantaleon ang bata mibutyag nga babaye maoy hinungdan sa giawayan sa iyang ginikanan.

Ang suspek sumala pa nga nakatultol sa gitagoan sa armas sa biktima ug gikuha kini ug diretso og pusil sa liog niini.

Daling gihatod ang biktima ngadto sa Mactan Doctors Hospital apan gideklarar kini sa mga doktor nga dead on arrival.

Ang suspetsado giingong dako ang pagmahay nga nabuhat ang krimen ngadto sa bana. (BANAT NEWS)