Shimura nangandoy pamolitika ihikling

CEBU, Philippines - Nangandoy  si Cebu 4th District Board Member Sun Shimura nga ihikling sa mga sakop sa hunta probinsyal ang pamolitika karon nga nahuman na ang piniliay  ning tuiga. Kini  maoy  iyang  mensahe nga iyang  giluwatan  pinaagi  sa media kagahapon   didto sa Capitol Social Hall.  Sigun pa ni Shimura nga dako kaayo ang iyang panghinaot nga pinaagi sa pagpadaplin sa ilang tagsa-tagsa ka mga bulok sa politika ma-alagaran sa mga sakop sa hunta probinsyal ang ilang mga konstituwente sa matag distrito  sa walay  pagpinig. Si Shimura naila nga kaalyado sa pamilyang Garcia sa partido One Cebu ug mahimong membro sa menoriya  nga  grupo  sa provincial board kay mayoridad  sa  mga  midaug  sa milabay  nga election  niadtong  Mayo 13 mga sakop sa Liberal Party. Matud niya nga ang gidaghanon sa mga sakop sa hunta probinsyal nga naa sa habig sa oposisyon  dili unya   mahimo nga babag sa ilang tinguha nga makahatag og kaayohan  sa mga Sugboanon.

Iyang gitataw nga dili gyud sila magmakuli sa paghatag sa ilang suporta ngadto sa bag-ong gobernador nga si Atty. Hilario Davide sa  mga  tinguha  niini  nga ikaayo  sa  mga Sugbuanon.

Ang pundok oposisyon  nga  mga membro sa One Cebu Party  sa  hunta  probinsyal  karon gilangkoban nila ni Board Member Julian Daan sa unang distrito, Board Member Alex Binghay sa ikatulong distrito, Bokal Shimura ug Bokal Joven Mondigo Jr. sa ikaupat nga distrito. (BANAT NEWS)