Hagit sa Comelec kang Soco, ikiha si Magpale

CEBU, Philippines - Gihagit   sa Commission  on Elections (Comelec)  si vice gubernatorial  candidate Glenn  Soco    pagpasaka  og  kiha  kun  masuta  niya  nga  may  malapas  sa balaod  sa Comelec  ang  Suroy-Suroy  Sugbo.

Kini  maoy  reaction  ni  Provincial Election Supervisor Eddie Aba  sa reklamo  ni Soco  batok  sa Suroy-Suroy Sugbo  nga gituohan  niyang  gigamit  ni  acting Governor Agnes  Magpale  sa iyang  kampanya  sa iyang  kandidatura

Gipasaka  ni Soco  ngadto  sa Comelec  ang  iyang  reklamo  uban  sa awhag  nga  angay  nga  unya  na  ipadayon  sa Kapitolyo  liwas  sa election sa Mayo  13  ang  Suroy-Suroy Sugbo .

Kini  tungod  kay  nagtuo  si  Soco  nga  dako kaayo  kining  bintaha  ni  Magpale  sa  iyang  kampanyang  politikanhon  nga  naggamit ug  nagpahimus  sa kuwarta  nga  iya  sa kagamhanan.

Si  Magpale  ubos  sa Liberal  Party  ug Soco  sa  Independent  Party   pulos  magpapili  pagka-bise  gobernador  sa Sugbo  karong  umaabot  nga  piniliay.

Gawas  sa kuwarta,  ang  mga  kahimanan  nga  iya  sa kagamhanan  naggamit  alang  sa  kampanyang  personal  ni  Magpale  nga dili angay  itugot  sa Comelec  sanglit  sila  ang  nagmugna  og  balaod  bahin  niini, sumala  ni  Soco.

Hinuon  si Aba  mipasabot  nga walay  hurisdiksyon  ang  Comelec  sa pagpa-oktaba sa Suroy-Suroy  Sugbo  tungod  kay  daan  na  kining  proyekto  sa kagamhanan  sa lalawigan.

Giawhag  usab  ni Aba  si Soco  nga  mas  maayong  mokuyog  siya  niini  tungod  kay  bukas  kini alang  sa tanan  ug masuta  usab  niya  kun  may  kalapasan  bang  himoon  si Magpale batok  sa  balaod  sa Comelec. 

Kun  ugaling  di  makakuyog  si Soco  sa  Abril 27-29 nga  Suroy-Suroy Sugbo  sa isla  sa Camotes “makapasaka  siya  og  kaso  kun masuta  niya  nga  nakalapas  kini  sa balaod” matud  pa  ni  Aba. (BANAT NEWS)