Dispatser gipatay sa nag-bonnet Patay ang usa ka dispatser og PUJ
CEBU, Philippines - Diha sa Tabunok, dakbayan sa Talisay human kini pusila sa wala mailhing lalaking nagtabon sa nawong kagahapon sa hapon diha duol sa simbahan sa Saint Joseph Parish sa nahisgutang barangay.
Ang biktima giila sa mga polis nga si Dominador Nacario, 39-anyos, residente sa maong dapit nakaangkon og usa ka samad pinusilan sa likod nga bahin sa iyang ulo wala na kini makaabot pang buhi ngadto sa Talisay City District Hospital.
Si Inspector Margienette Yosores uban nila ni SPO1 Mikie Espina, PO1 Stephen Sefuesca ug PO1 Edwin Campomanes ang daling miresponde sa maong insidente.
Si Yosores nga nahinabi sa Banat News kagahapon nagkanayon kini nga ang mamumuno kinsa nag-inusara sakay sa usa ka motorsiklo nga walay plaka nagsul-ob og bonnet ug helmet mikanaog kini sa motor dihang nakita niini ang biktima diha sa lugar.
Ang mamumuno mipaduol sa biktima ug sa walay daghang pangutana gidul-itan ang biktima og pusil sa ulo. Human og pamusil ang mamumuno daling mibalik og sakay sa iyang motorsiklo dayon pasutoy ngadto paingon sa habagatan.
Na-recover sa mga polis gikan sa lugar nga nahitaboan ang usa ka kabhang sa bala sa kalibre .45 nga pistola.
Si Yosores midugang nga personal nga bangi ang usa sa ilang gituohang motibo sa maong insidente diin posibleng ang biktima dunay nakabangi diha sa karsada. Ang kapolisan nagpahigayon og follow-up nga imbestigasyon sa maong insidente. (BANAT NEWS)
- Latest
