Principal sa Aloguinsan imbEstigahonon
CEBU, Philippines - Mimando og imbestigasyon ang Department of Education ( DepEd) batok sa mga matutudlo ug principal sa Aloguinsan National High School kinsa giingong naningil og amot alang sa gradwasyon sa mga tinun-an karong Marso.
Kini tungod kay daghang mga ginikanan ang misumbong sa Bantay Radyo gumikan sa giingong pagpaningil sa mga magtutudlo sa maong eskuylahan og tag P75 matag tinun-an nga mograduwar alang kuno sa pagkaon sa mga opisyal sa DepEd nga motambong sa graduation.
Sentro sa ilang gireklamo mao ang principal sa maong tunghaan nga si Mr. Paterno Verano nga wala usab makuhai og habig gumikan kay walay landline ang maong tunghaan.
Si DepEd Province Supt. Dr. Arden Monisit daling mipasabot atol sa interview sa Bantay Radyo nga wala itugot ang pagpaamot sa mga tinun-an panahon sa graduation.
Giklaro ni Dr. Monisit nga miluwat siya og direktiba bahin niini niadtong Biyernes nga nagpahinumdom sa tanang mga principal ug magtutudlo sa publikong tunghaan sa Sugbo nga gidili ang pagpangolekta og bisan unsang amotan panahon sa graduation.
Giklaro usab ni Dr. Monisit nga wala na kinahanglana nga andaman pa og pagkaon ang mga DepEd personnel nga motambung sa graduation sa kalungsoran kay aduna man silay travel allowance.
Gani dugang pa niya nga wala usab kinahanglana ang pagpugos sa mga ginikanan pagpapalit og mahalong senina nga isul-ob atol sa graduation tungod kay mahimo ra man nga ang mga school uniform ang ipangsul-ob aron makadaginot ang mga ginikanan. Busa giawhag ni Dr. Monisit ang mga ginikanan sa pag-report ngadto sa buhatan sa DepEd ni kinsa mang magtutudlo nga mangayo og amot kalabot sa nagsingabot nga gradwasyon. (BANAT NEWS)
- Latest
