‘Butanding’ nasangit sa pokot giluwas sa mga mangingisda

DIMIAO, Bohol, Philippines — Giluwas sa mga mangingisda uban sa kapulisan sa lungsod sa Dimiao ang usa ka “Butanding” o “whaleshark” nga nasangit ug nalit-ag sa usa ka pokot niadtong miaging Sabado (Nov. 17), matud sa Physalus, usa ka non-government organization nga nagpasiugda sa pagpanalipod sa kadagatan.

Ang mga sakop sa “task force” sa Bohol Environment Management Office (BEMO) nga sila si Elmer Apale ug Ariel Dagodog nagkanayon nga ilang nasigpatan ang usa ka sakayan nga nagguyod sa usa ka dakong isda.

Matud sa duruha (Apale ug Dagodog) nga samtang sila namahulay sa daplin sa baybayon sa Barangay Banban, lungsod sa Dimiao gikan nagpatrolya ilang nakita kining nag-aginod nga nagguyod sa maong dakong isda nga “Butanding.” Tungod sa pagtuo ug pamasin nga karnihon ang “Butanding,” si Apale ug Dagodog misitar sa mga mangingisda  ug gihangyong buhian ang mananap tungod kay kini “protected” na ug “endangered” ang ilang kaliwat.

Wala hinuon magmakuli ang mga mananagat, kinsa nagdala og mga sundang sa pagbuhi sa maong isda ug nangatarungan nga wala silay planong ihawon kini tungod kay buot lang nilang pamutlon ang pukot nga nabulibod sa lawas niini aron kini buhian.

Matud ni Apale ug Dagodog sa exclusive nga interview kanila nga ang “Butanding” mora’g wala na’y umoy tungod sa pukot ug sa upat ka oras nga pagguyod sa mga mananagat.

Dihang nangabot ang mga tawo wala kalikaying gipangtungtungan ang maong isda nga niadtong higayona pa nila makit-i hinungdan nga gibadlong sila sa duha inabagan sa mga miabot nga mga polis.

Ang maong butanding may gitas-ong 5.8 metros apan gihulagway nga batan-on pa kini ug gibanabana lang nga gatosan ang gibug-aton sanglit walay gamit nga makahimo niini aron masukod kini atol sa hitabo. Human matangtang ang pukot hinayhinay nga mibalik og langoy palayo ang maong isda. (BANAT NEWS)