German national namatay sa kama

CEBU, Philippines - Usa ka German National  nakit-ang patay sulod sa gipuy-ang apartment  niini sa Peace Valley, Barangay Lahug,  Siyudad sa Sugbo kagahapon sa hapon. Ang langyaw nailhan nga si Mario Hasler, 47, usa ka supervisor sa Electric Sub Station sa Saudi Arabia, ug temporaryong nagpuyo sa Barangay Lahug ning Siyudad.

Matud ni Cathy Valiente dugay  na  nga  gipamati  sa maong  langyaw   ang  sakit  sa  iyang  tutonlan ug may gipamati sad kini sa tiyan tungod kay magpunay kini og suka, gani gipa-check-up  sa Vicente Sotto Memorial Medical Center (VSMMC) Psychiatric Ward niadtong Oktubre gumikan sa depresyon.

Apan   hapon sa miaging adlaw, nakita  ni Kenneth Valiente, igsuon ni Cathy  si Hasler  nga nagbuy-od ibabaw sa kama. Tungod   sa iyang  kabalaka , iyang gitawag  si Cathy ug ang kapuyo niini nga si Dennis Garciano ug sa ilang pagsusi patay na kini.

Nakuha gikan sa kwarto sa langyaw ang usa ka passport, bag nga puno sa mga papeles ug dokumento, ug yellow card gikan sa VSMMC Psychiatric Ward.

Ang kapolisan  nga  mihiling  sa lawas  sa  maong langyaw  walay nakitang  samad apan  ila pa kining  ipaubos sa autopsy  aron pagsuta  kun  wala  bay  foul  play  ang kamatayon niini. (BANAT NEWS)