King Cobra nadakpan sa Sirao

CEBU, Philippines - Gitakda karong adlawa nga susihon sa taga Department of Environment and Natural Resources (DENR-7) ang nadakpan  nga  King Cobra didto sa bukirang  barangay sa syudad sa Sugbo.

Nasayran  sa Banat News  nga  ang maong  bitin  didto  hidakpi sa Barangay Malubog niadto pang Oktubre  niining tuiga.

Si Dr. Ed Llamedo, tigpamaba sa DENR-7 mibutyag  sa Banat News kagahapon nga  ila pang sutaon kun  King Cobra ba gayud  ang  maong  bitin.

Ang maong  halas  sa  pagkakaron  anaa sa  barangay  hall  sa barangay  Sirao, kasikbit  nga  barangay  sa Malubog, kay taga Sirao  ang  nakasikop  niini.

Apan mitawag  ang  mga molupyo  sa maong lugar  sa Banat News  tungod  sa ilang kabalaka  nga  makapahit  na  usab  unya  ang  maong  bitin og tawo nga magkahulogan  sa kapeligro  sa kinabuhi  niini.

Sa pakighinabi sa Banat News kagahapon sa usa sa mga nakasikop sa maong bitin nga si Norman Jade Ardona, 19, ulitawo, nga lumad nga taga Sirao iyang gisaysay nga niadtong ikatulo nga semana sa bulan sa Oktubre sa pasado alas 11:00 sa gabii nanulo sila og mga baki kauban nila ni Harris Tudtud, 19,  ulitawo , Rodelio Bonghanoy, 26, ug Jerwin Cobrado, 20,  nga pulos taga  Sirao, nakurat sila dihang si Bonghanoy kalit  lang  nga misyagit  nga  nagkamamad   ang tingog  kay imbis  baki  ang  masikop, bitin  man  hinuon  ang iyang nakuptan.

Dihadiha  gigamit  dayon  nila  ang  dala  nilang kahoy  nga may alambre  ang  tumoy ug gipiit  ang  ulo  sa maong  bitin  busa  sayon kaayo  nila  kining  nasigpo ug gisulod  sa sako.

Unya ila kining  gibalhin  sa  usa  ka dakong halwa ug  ang  nasaksihan  nga  inighana  niini  og  hambat, mobukad  ang  liog  nga  magpakita  sa  iyang pagkamangtas  hinungdan nga gituohan nila kining usa ka King Cobra busa gikabalak-an sa kini sa mga  molupyo.

Maoy  hinungdan  nga isip taga Sirao  kining  tigbalita, nakahukom  ang  mga  molupyo sa  maong  lugar  nga ilang itunol  sa DENR  ang  maong  halas pinaagi  sa Banat News agi  og tubag  sa  awhag  sa maong ahensya   sa  pag-turn over  kanila kutob  sa  mga  wildlife  nga  madakpan  sa  mga  molupyo.

Mahinumdoman  nga  sa milabay  nga  mga  buwan  usa  sa nakadakop ug napaakan og King Cobra  nga si Reynaldo Abenturado    usa  sa  mga trabahante  sa Cebu City Zoo, nasalbar  pinaagi  sa tambal nga gidapat  kaniya  gikan  sa lalawigan  sa Camiguin.

Si anhing pilot captain Jessup Bahinting nahimong instrumento  sa iyang  kaluwasan  sanglit  si Bahinting  maoy  miboluntaryo  sa pagkuha  sa maong  tambal gikan  sa Camiguin. (/WC) (BANAT NEWS)