Daghang nagbagulbol kay wa marehistro

CEBU, Philippines - Giklaro ni Cebu City north district election officer nga si  Marchel Sarno nga wala gyuy extension  sa rehistrasyon ug igo ra siya nga nagtuman sa mando  sa ulohang buhatan sa Commission on Election (Comelec).

Gipadayag kini ni Sarno human makadawat og daghang pagsaway kagahapon gikan sa gatosan ka mga tawo nga wala marehistro gumikan kay naabtan sila sa oras sa pagtak-op sa rehistrasyon.              

Nasayran nga adunay bag-ong lagda nga gipagawas sa Comelec kagahapon nga  kutob ra sa alas 3:00 sa hapon ang ilang cut-off time.

“Kung maabot na og alas tres, kadtung naa pa sa linya, amo ilista ang ilang ngalan. Maapil sa listahan, seguro mga 100 ka buok, nga kutob ra gud sa alas 5 nga marehistro,” suma pa ni Sarno.

Kagahapong adlawa ang katapusang rehistrasyon ug giingong Martes pa lang sa gabii, aduna na’y mga naglinya nga  mga magparehistro.

Ang mga tawo misinggit  og “boo” sa dihang giingnan sila nga mitak-op na ang pagpanawat sa taga Comelec og aplikasyon.

Base sa gihimong record  sa Comelec nakarehistro kini og kapin sa 500 ka  tawo sa usa ka adlaw. Sumala pa ni Sarno nga daghan gyud ang nagyawyaw nga mga tawo kagahapon apan ila kini nga gipasabot bahin  sa lagda sa ilang ahensya.

Gihangyo  ni Sarno sa mga tawo nga sa sunod nga rehistrasyon, dili na unta mahitabo ang maong sitwasyon diin palabihon  ang pagtuman  sa kinaiya  nga unya  na  moatiman  sa gimbuhaton inig-abot sa katapusang  adlaw niini.

Wala’y extension ang rehistrasyon sanglit adunay  gituman ang Comelec nga schedule sa ilang mga gimbuhaton sama sa paghan-ay pa sa master list sa mga botante  nga maoy dako kaayo nilang  trabaho. Ila  usab  nga  katungdanan  ang  pagpahimutang sa mga ngalan sa mga kandidato alang sa piniliay sunod tuig.  (BANAT NEWS)