Sa kasaysayan karon Oktubre 11

Arsobispo dela Cuesta

CEBU, Philippines - 1719— Nahimong acting –governor general sa Manila si Archbishop Francisco dela Cuesta sulod sa tulo ka tuig. Si dela Cuesta gipanganak sa Colmenar, Madrid sa Espanya ug nahimong Master of Theology ug nahimong tigtambag sa Hari sa Espanya. Sakop siya sa Order of Saint Jerome ug nahimong arsobispo sa Manila niadtong 1706. Nahimong kaaway ni dela Cuesta ang gobernador-heneral nga si Fernando Bustamante nga miresulta sa iyang pagkasikop diha mismo sa Manila Cathedral. Kaniadto higpit kaayo ang pagsunod sa “right of sanctuary” ug ang makalapas niini bisan kinsang opisyal sa gobiyerno mahimong makontrahan sa mga sumusunod sa simbahan. Tungod sa maong hitabo nasuko ang ubang kongregasyon sa simbahan sama sa Franciscans, Augustinians ug Dominican friars. Giingong gisulong sa mga tawo ang Palasyo ni Bustamante ug kini gipatay ug gipabuhian si dela Cuesta. Tungod kay walay buot mopuli kang Bustamante awtomatikong si dela Cuesta maoy mibarog nga gobernador heneral sa nasud sugod Oktubre 11, 1719. Niadtong Hulyo 25,1721 gitangtang siya sa hari sa Espanya sa maong pwesto ug gibalhin sa Michoacan, Mexico. Didto na siya namatay sa edad nga 63 niadtong Mayo 30,1724.

English newspaper

1898—Karong adlawa natukod ang labing karaang pamantalaan sa Pilipinas nga sinuwat sa Englis nga mao ang Manila Times. Kini gitukod sa Amerkanong si Thomas Gowan tungod sa kadaghan na sa mga Amerkanong nagpuyo sa Manila. (BANAT NEWS)