Seawall gipangayo sa taga Talisay

CEBU, Philippines - Kagamhanan sa dakbayan sa Talisay nangayo og mga semento sa kagamhanan sa probinsiya aron gamiton sa pagpatukod og seawall sa mga coastal barangay sa Talisay.

Niadtong Martes atol sa regular session sa konseho sa Talisay si Konsehal Rodi Cabigas, chairman committee on public works and infrastructure mipalabang og resolusyon nga naghangyo kang Gob. Gwendolyn Garcia nga hatagan sila og dugang 5,000 bags nga semento alang sa katukoran sa seawall diha sa barangay Dumlog, Poblacion ug Tanke.

Kahinumduman nga niining bag-o lang ang mga residente diha sa daplin sa baybayon habig sa Dumlog paingon ngadto sa Poblacion nga wala pay seawall ang gikuso-kuso sa dagkong bawod tungod sa hanging habagat.

Ang mga residente sa Dumlog ug Poblacion mao kaniadto ang kanunay’ng mangreklamo tungod sa mga dagkong balod hinungdan nga gihimoan sila sa siyudad ug lalawigan og seawall, apan wala kini matiwas ug dunay parte niining nangabuak na usab tungod sa bawod.

Kakuwang sa pundo maoy hinungdan nga wala kini matiwas sumala pang Cabigas. ( /EIM)   - BANAT NEWS