Nangawat og motor tiklo

CEBU, Philippines - Nasikop sa tanod ang usa ka ulitawo human kawata niini ang motorsiklo sa iyang silingan sa barangay Tanke, dakbayan sa Talisay kagahapon sa buntag.

Ang suspetsado giila nga si Carlo Panggo, 18, ulitawo nga   taga dalan Salvador, barangay Tanke, sa maong dakbayan, samtang ang biktima nga tag-iya s a Kawasaki nga motorisklo nga may plakang GT-9836 mao si Jefferson Talan nga silingan sa suspek.

Gumikan sa reklamo sa biktima ngadto sa kapolisan sa Talisay, gitahasan dayon sa kapolisan si Jupiter Escañan, tanod sa Tanke sa pagresponde sa maong reklamo.

Dali kaayong nasakpan ni Escañan ang suspek ug ang gikawat nga motorsiklo niini didto sa kasikbit nga barangay San Roque, sa maong dakbayan.

Gisikop dayon ang suspek ug gihatod   ngadto sa buhatan sa kapolisan sa dakbayan diin tua siya itanggong ug ang motorsiklo giuli usab sa kapolisan ngadto sa tag-iya niini. (BANAT NEWS)