Tihik nga Hapon gikawatan

CEBU, Philippines - Ang katihik sa Hapon maoy girason sa tulo ka mga babayeng gipasanginlang nangawat sa langyaw ug gibalhog sa karsel sa Lapulapu Police Station kagahapon.

Ang biktima mao si Keni Chi Murasaki, 73, Japanese national nga kasamtangang nag-abang sa usa ka apartment sa Sangi Road, sa barangay Pajo, Lapu-Lapu apan lumad nga taga-Tokyo,Japan.

Si Murasaki mireklamong nawagtang ang iyang one million Japanese Yen nga nagkantidad og P530,000 ug bulawang relong Rolex nga nagkantidad og P50,000 diha sa kwarto.

Ang gidakop mao sila si Mary Jane Alonzo, 20, taga-Kagudoy, barangay Basak; Chona Pino, 22, nga taga-Sangi New Road ug Laniflor Taneo, 18, taga-sitio Timpolok, Babag sa samang siyudad pulos higala sa Hapon.

Asoy pa ni PO2 Joseph Rouel Cutanda sa Theft and Robbery Section (TRS) sa LLCPO sa ilang pag-review sa CCTV camera sa maong apartment nakita nila sila si Alonzo ug Pino nanggawas mga pasado alas- 4 sa kaadlawon niadtong Miyerkules.

Ang mga suspek dihang giimbitar sa kapolisan gikatahong mibutyag nga paanhaon gyud sila sa maong Hapon matag moabot kini dinhi ug usahon sila pagpangatulog apan tihik kini maong nahimo nila ang maong salaod.

Nabawi ra hinuon ang Rolex nga relo, apan 43 ka lapad na lang ang nahibilin sa kwarta, ug ang desk top computer nga bag-ong gipalit gamit ang maong kwarta. Atol niining pagsuwat giandam ang kasong qualified theft batok sa tulo. ( /EIM)   - BANAT NEWS