Capitol mipalit og 26 ka tourist bus

CEBU, Philippines - Gitakdang moabot sa Sugbo karong Agusto ang 26 ka mga state of the art tourist bus kon mini coaches nga nagkantidad og P67.6 milyones nga paliton sa kagamhanan sa lalawigan alang sa 20 ka mga lungsod ug dakbayan nga mudaog sa eGWEN our Cebu Program ug ingon man sa mga lungsod ug dakbayan nga nakaduso na sa ilang lokal tourism package tour ngadto sa buhatan sa gobernador.

Kini ang gitug-an ni manlalaban Rose Arnado sa Provincial Legal Office nga nahinabi sa Sugbo News team ug Banat News kalabot sa imported nga mga sakyanan.

Matud ni Arnado nga human modaug ang 3 in 1 Mktng/Conequip Philippines, Inc. sa subasta, gimando dayon sa gobernador nga susihon kini aron sa pagsuta kung de-kalidad ba gayud ang maong mga sakyanan nga midaug sa bidding.

Gitug-an usab ni Arnado nga ang nahisgutang kompaniya mohatag usab og lima ka tuig nga warranty alang sa maong mga sakyanan ug mipasalig pa kini nga may giandam sila nga 24 oras nga mobile mechanic nga moserbisyo unya sa maong mga sakyanan kun pananglit maabireya sa dalan.

Nasayran nga mokantidad og tag P2.6 milyones ang matag usa ka tourist bus nga   ipanghatag unya ngadto sa mga mayor sa kalungsoran ug dakbayan nga modaug sa eGWEN our Cebu Program.

Ang pagpanghatag niining maong premyo himoon unya atol sa pagsaulog sa ika- 443 ka tuig nga anibersaryo sa pagkalalawigan sa Sugbo. (BANAT NEWS)