Gwen mitambong sa Palawod Festival

CEBU, Philippines - Nalingaw kaayo si Governor Gwendolyn Garcia sa pasundayag sa Palawod Festival sa piyesta sa lungsod sa Bantayan Island sa miaging adlaw.

Gitambongan usab niya sa maong higayon ang pagsubo sa bag-ong nahuman nga Legislative Building sa maong lungsod.

Ang gobernador nga misakay sa chopper sa Central Command gisugat sa mga opisyal sa lungsod nga gipangunahan ni Vice mayor Geralyn Escario Cañares, Board Member Joey Boy Hulganza Jr. ug sa iyang pag-abot gisubhan dayon ang ilang legislative building.

Human sa pagsubo sa edipisyo gisunod    dayon ang pagbukas sa ika-12 nga Palawod Festival nga gipahigayon sa atubangan gyud mismo sa balay lungsod sa Bantayan uban sila si mayor Ian Christopher Escario ug Board member Joven Mondigo Jr.

Ang maong festival gisalmotan sa 7 ka mga intrante nga gilangkoban sa upat ka sumasalmot sa Palawod sa kabataan; ang San Jose cluster; kabangbang cluster; Bario Schools clusters Bantayan-I; ug ang Palawod sa Kabatan-onan nga gilangkoban sa Doong National High school; Bantayan National Science High school; ug ang Patao National High School.

Atol sa maong kalihokan gipadayag sa gobernador ang iyang mensahe ngadto sa mga taga Bantayan uban sa pasalig nga niining iyang ika walo na ka tuig nga pagkagobernador sa Sugbo iyang gisaad nga dugangan pa niya ang iyang tabang sa mga kalungsoran ning lalawigan.

Agi og pagmatuod sa iyang mensahe, si Governor Garcia mitunol dayon sa P2.3 milyones nga tseke ngadto kang Mayor Ian Christopher Escario ug kang Vice Mayor Geralyn Escario Cañares.

Kini alang sa gastohanan sa Palawod Festival ug gasto sa pagpamalit og dugang mga office equipment sa bag-ong nahuman nga legislative building.

Misaksi usab sa Palawod Festival si kanhi Cong. Cynthia Villar sa syudad sa Parañaque kinsa mituyo gyud pag-adto sa Bantayan alang sa maong kalihokan. - Chester Abadilla/WC (BANAT NEWS)