Lawas sa suspek sa pagpanulis gipaugkat
- Rey Pasaporte (The Philippine Star) - June 30, 2012 - 12:00am

CEBU, Philippines - Giugkat sa National Bureau of Investigation (NBI) Central Visayas kagahapon sa buntag ang patay’ng lawas sa usa ka menor de edad nga gipasanginlang nanulis ug napusilan-patay sa mirespondeng off-duty nga babayeng polis niadtong Hunyo 7. Ang mga tinugyanan sa Commission on Human Rights (CHR)-7, mga kabanay sa namatay ug ingon man ang medico-legal sa NBI-7 nag-uban pag-ugkat sa patay’ng lawas sa 17-anyos nga napusilan nga taga barangay Tisa ning siyudad. Ang CHR-7, kinsa giduol sa mga kabanay sa 17-anyos tungod kay dako ilang pagdudang inosente kini, maoy mihangyo sa NBI-7 nga ugkaton ang patay’ng lawas gikan sa lubnganan niini diha sa Calamba Cemetery.

Tuyo sa pamilya nga mahatagan sila og katin-awan pinaagi sa linaing imbestigasyon sa CHR-7 sama sa kung pila gyud ka bala ang nakaigo sa namatay nga nakaingon sa iyang hinanaling kamatayon.

Si Rodulfo Paqueo, investigator sa CHR-7 nga nahinabi sa mga tigbalita nagkanayon nga sila maoy mihangyo sa NBI alang sa subli kining ma-awtopsiya.

Matud ni Paqueo nga base sa ilang nakuhang report gikan sa kapulisan dunay nahitabong shoot-out tali sa namatay ug ni PO2 Leah Juarez ug kini maoy buot nilang klaruhon.

Apan si Dr. Rene Cam medico-legal sa NBI mipasabot sa mga tigbalita nga usa lang ka samad pinusilan ang naangkon sa walang dughan sa 17-anyos apan kini milapos sa bukobuko.

Hinuon dili pa siya makapasabot pag-ayo kabahin niini tungod kay nagpadayon pa man ang imbestigasyon apan ang tanan nilang findings ila kining iduso ngadto sa CHR.

Ang kauban sa namatay nga si Richard Baculi gipasakaan na og kaso human siya nadakpan ni Juarez ug kauban niining si PO2 Percival Perigo human sa ilang ginukdanay gikan sa Ayala Business Park hangtud sa Capitol Building sa dalan M. Velez St., sa barangay Guadalupe. Ang namatay ug si Baculi giingong mitulis sa usa ka babaye . (BANAT NEWS)  

AYALA BUSINESS PARK CALAMBA CEMETERY CAPITOL BUILDING CENTRAL VISAYAS DR. RENE CAM HUMAN RIGHTS LEAH JUAREZ NATIONAL BUREAU OF INVESTIGATION PERCIVAL PERIGO
  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with