Negosyante nakuhaa'g shabu

CEBU, Philippines - Usa ka negosyante og baboy ang nadakpan sa kapulisan atol sa kinalit nga pagronda sa mga nagsugal diha sa sitio Calihan sa barangay Labangon sa siyudad sa Sugbu sa miaging alas-10 sa gabii.

Naghilak sa kahadlok si Ruel Ruiz, 36, taga Tabango, Leyte sulod sa Punta Princesa Police Station human kini giingong nakuhaan og upat ka paketeng gituohang shabu sa grupo ni SPO4 Gualberto Oroc.

Si SPO2 Jaime del Mar nga nahinabi sa Banat News nagkanayon nga nakadawat sila og tawag sa telepono gikan sa usa ka concerned citizen ug mitug-an nga dunay naghantak sa daplin sa karsada diha sa maong lugar hinungdan nga girespondihan dayon sa grupo ni Oroc.

Pag-abot sa kapulisan naglumba sa pagpanagan ang mga sugarol apan si Ruiz ray nasignit sa kapulisan kinsa gikatahong ilang nakit-ang may gikuot sa bulsa ug gilabay, apan dihang gipunit sa mga polis ang gilabay niini nasuta nga shabu diay kini. Si Ruiz giingong gikan pang nagtumod og baboy dinhi sa dakbayan sa Sugbu gikan sa Leyte ug giingong nagpalabay lang unta sa panahon ug mitan-aw kini sa mga naghantak sa maong lugar.

Matud ni del Mar nga ilang kasuhan si Ruiz sa kalapasan sa Section 11 (possession) sa Article 2 sa Republic Act (RA) 9165 kinsa anaa karun gitanggong sa detention cell sa Punta Princesa Police station. (BANAT NEWS)