SALN di isyu para sa gobernador

CEBU, Philippines - Dili na isyu   ang pagkinahanglang ipakita ug ipahibalo sa publiko ang Statements of Assets, Liabilities and Networth (SALN) sa mga nag-alagad sa executive ug legislative department sa gobiyerno, sumala pa ni Gobernador Gwendolyn Garcia.

Kay alang sa gobernador bukas kaayo para sa publiko   ang pagsil-ing sa iyang SALN kay sukad sa iyang paglingkod isip gobernador napublikar na sa pamantalaan ang iyang katibuk-ang SALN sanglit   sayon ra man kining   makuha sa mga sakop sa media.

Human nila kini makuha mahimo na nila nga ipublikar sa pamantalaan ug isibya sa radyo ug isalida sa television.

Busa alang sa gobernador wala siya’y angay itago sa katawhan kay ang tanan niyang mga butang gikan sa balay, yuta, sakyanan, mga muwebles, mga alahas ug bisan pa ang mga deposito niya sa bangko iyang giyagyag ang tanan sa iyang SALN.

Miingon si Garcia nga kasagaran sa iyang mga butang kinitaan niya sa wala pa siya mag-alagad sa kagamhanan ug nagdumala siya og usa ka kompaniya sa maong mga panahon.

Gitataw sa gobernador nga ang iyang pagtrabaho isip opisyal sa gobiyerno wala isentro sa pagpadato sa iyang kaugalingon kun dili tinuoray nga serbisyo publiko.

Dugang pa sa goberndor nga ang tanang butang   nga iyang gitug-an sa iyang SALN maoy tinuoray niyang mga kabtangan nga naangkon ug wala siya’y gitaguan sanglit mao man kini ang tinuoray niyang kahimtang sa pagpuyo.

Ang maong pamahayag gihimo ni Garcia agi og tubag sa awhag sa kadaghanan nga angay ibutyag sa tanang kawani ug opisyal sa gobiyerno ang ilang SALN. (WC)(BANAT NEWS)