Ihi sa drug test gitikas

CEBU, Philippines - Dunay pagduda si Chief Supt. Marcelo Garbo Jr., ang hepe sa Police Regional Office – 7, nga posibleng gi-tamper ang resulta sa confirmatory test sa nagbinugtong nga pulis gikan sa Cebu City Police Office (CCPO) nga nagnegatibo sa ginadiling drugas.

Matud ni Garbo nga posibleng gihulipan ang urine sample sa maong pulis nga maoy gigamit sa Philippine National Police Regional Crime Laboratory-7 sa confirmatory test. Ning bag-ohay lang, gipahibalo sa PRO-7 nga pito lang sa walo ka mga pulis sa CCPO nga gidudahang mga drug addicts ang kompirmadong tiggamitan og illegal drugs base sa confirmatory test pipila ka adlaw human ang surprise test niadtong Mayo 2.

Dugang ni Garbo nga iya nang gimanduan ang Regional Investigation and Detective Management Division (RIDMD) -7 nga palawman pa ang ilang imbestigasyon aron maugkat ang kamatuoran luyo sa maong insidente ug masilutan ang maong pulis.

Pasalig ni Garbo nga ila gyud gukdon ang maong pulis nga gikatahong mi-tamper sa iyang ihi. Ang maong pulis, uban ang laing pito, ang gipaubos na sa pre-charge proceeding sa PRO-7.

Padayon gihapon nga giimbestigar sa PRO-7 nganong ang mitikolosong proseso sa crime lab nalutsan gihapon sa maong pulis.

Base sa screening standards nga gisunod sa tanang mga drug testing centers, ang pagkolekta sa ihi kinahanglan kuhaon sa presensya sa usa ka sakop sa screening test aron masigurong dili kini ilisan o butangan og laing “limpyong” ihi.

Samtang si Sr. Supt. Melvin Ramon Buenafe, hepe sa CCPO, nagkanayon nga naa pa gihapon sa CCPO ang walo ka mga pulis tungod kay wala pa siya makadawat og direktiba gikan sa PRO-7 nga ibalhin sila.

“Wala pa’y order transfer from PRO-7. The orders are under the authority of the regional office,” matud pa ni Buenafe. (BANATNEWS)