Ginang gitagudtagod sa ex-convict

CEBU, Philippines -Namatay diha-diha ang usa ka ginang human kini tagud-tagora sa kanhi niya hinigugma nga usa ka ex-convict didto sa barangay Ibo ,siyudad sa Toledo niadtong Domingo sa alas 3:00 sa hapon.

Ang biktima mao si Nerrisa Caberte, 45, dalaga apan dunay mga anak, nga taga barangay Bato, sa maong dakbayan ug nagtrabaho isip katabang.

Samtang ang suspetsado mao si Vicente Espina, 70, minyo, kansang asawa tua sa gawas sa nasud, ug usa ka ex-convict ug silingan ra sa biktima.

Si SPO4 Carmilito Hornales, Desk Officer sa Toledo City Police Station mibutyag sa Banat News nga ang biktima kinsa nalisoan sa maayong pangisip didto magtrabaho isip katabang sa panimalay sa duol sa balay   sa suspek.

Ang suspek kinsa giingong gikarelasyon sa biktima sa milabay’ng mga adlaw, nagmulo sa biktima kay matud pa mosaka kini sa iyang balay ug manghilabot sa iyang mga butang nga dili mananghid kaniya.

Hinungdan nga niadtong Domingo gumikan sa hilabihang kalagot sa suspek kay buot na usab unta kining mosaka sa iyang balay   iyang gibadlong busa mikaratel kini og dagan. Ang suspetsado nga nagdala og sundang migukod sa biktima ug dihang naapsan kini iyang gitigbas ang buko-buko ug giusban pa kini niya sa tiyan ug tungod kay nanagang natagudtagod sa sundang   ang bukton sa biktima hangtud nga nakabsan kini sa   kinabuhi.

Ang suspek milayas dayon human sa hitabo ug sa paggama ning balita padayon pa ang hot pursuit operation sa kapolisan kaniya.   - BANAT NEWS