K12 di pa angay ipatuman

CEBU, Philippines - Wala pa nahaom karong panahona ang pagdugang og duha ka tuig sa high school nga gitawag og K12 gumikan kay dili kini mao ang pamaagi sa pagsulbad sa problema sa edukasyon sa nasud. Kini maoy gibutyag sa tigpamaba sa Akbayan-Youth nga si Mikay Dumaboc kinsa mipadayag nga nagkuwang karong panahona ang mga classrooms ug libro, saktong suholan sa mga magtutudlo.

“Maayo man ang intensyon sa Department of Education sa K12, pero dili pa man na angay i-implement karong panahona,” sumala pa ni Dumaboc.

Kahinumduman nga misaway usab kaniadto si Bise Mayor Joy Augustus Young sa maong pamaagi gumikan kay nakahatag kini og problema sa mga ginikanan ilabi na kadtong naglisod sa pagpaeskwela sa ilang anak.

Samtang   si Jon Rebello, 37,   usa ka amahan nga nahinabi sa Banat News kagahapon miingon nga nasagmuyo siya og maayo sa pagkahibalo niya kalabot sa K12.

“Asa man intawon mi og kwarta uy. Daghan pa kaayo ang sulbaronon nga problema sa atong nasud. Kami nga mga pobre ang luoy kung matuman na,” sumala pa ni Jon Robello, usa ka amahan nga may tulo ka anak sa elementary nga nahinabi sa Banat News.

Ang K12 maoy pamaaging nakita sa gobiyerno aron mapalambo ang sistema sa edukasyon sa nasud nga karon mao nalay nagpabiling nasud sa Asya ug kalibutan nga napulo ra ka tuig ang basic education nga mao ang elementarya (unom ka tuig) ug high school (upat ka tuig).

Si Maricar Escuyos nga usa ka maestra sa iyang bahin nagtuong dako og matabang ang K12 sa mga bata. (BANATNEWS)