Pagbalhin ni Arsenio gihikay na

CEBU, Philippines - Gidungog na sa sala ni Judge Sylva Aguirre Paderanga ang motion sa lalawigan sa Sugbo nga nagtinguha sa pagpabalhin sa akusado nga si kanhi Mayor Alfredo Arsenio sa lungsod sa Lezo, Aklan gikan sa CPDRC ngadto sa Cebu City Jail sa siyudad sa Sugbo nga gidumala sa Bureau of Jail Management and Penology (BJMP).

Kini ang gikonpirmar sa usa sa mga abogado sa lalawigan nga si manlalaban Richie Capahi atol sa pagpakighinabi sa Sugbo Tv news team ug Banat News human sa hearing sa sala ni Judge Paderanga sa miaging adlaw.

Matud pa ni Capahi nga ang nahisgutang pagdungog gitambungan mismo sa abogado sa prosecution kinsa miuyon sa tinguha sa lalawigan sa Sugbo nga mabalhin ang kanhi mayor   sa lungsod sa Lezo.

Mitambong usab sa maong higayon   ang abogado sa akusado kinsa mipakita sa ilang dakong pagsupak sa nahisgutang motion.

Hinuon gitakda nga dunggon pag-usab ang motion to transfer the accused karong umaabot Mayo 31, 2012 aron usab mabati sa korte ang habig sa BJMP sa dakbayan sa Sugbo.

Subay niini gilauman sa abogado sa lalawigan sa Sugbo nga mo-submit for resolution ang matag kampo human unya sa sunod nga pagdungog. (/WC) (BANATNEWS)