Polis nga mipatay'g vendor gibalhi'g priso

CEBU, Philippines - Pormal nang gibalhin kagahapon sa detention cell sa Cebu City Police Office (CCPO) si SPO2 Cresente Dacillo nga nakapusil patay sa usa ka tindero og balut didto sa sitio Laguna, barangay Bulacao, dakbayan sa Sugbo sa miaging semana.

Kini human mabantayi sa mga paryente ni Premo Callego, ang gipatay sa suspetsado nga gihatagan   kuno og special treatment sa kapolisan sa Pardo ang suspek.

Gani matud pa sa tagtungod sa biktima nga nakita nila ang suspek niadtong Huwebes nga nagsuroy-suroy gawas sa prisohan ug milantaw pa kanila samtang nagpaingon sila sa paglubong   sa biktima ngadto sa menteryo  sa Carreta. 

Matud pa sa kabanay sa biktima nga daghan nang mga higayon nga nakita nila si Dacillo nga anha mag-estambay sa gawas sa prisohan ug gipasagdan lang sa mga polis sa Pardo.

Si Sr. Supt. Melvin Ramon Benafe, hepe sa CCPO nga nahinabi sa mga tigbalita nagkanayon nga iyang gimandoan si Chief Insp.   Milbert Esguerra, hepe sa Pardo Police station nga ipahatud si Dacillo kagahapon sa buntag ngadto sa detention cell sa CCPO aron malikayan ang posibling pagkuot niini sa kabanay sa biktima didto sa Pardo Police Station.

Hinuon   si Esguerra hugtanong mihimakak sa pasangil nga ilang gihatagan og special treatment si Dacillo.

Matud ni Buenafe nga gibutyag ni Esguerra kaniya nga ilang gibuwag si Dacillo sa laing mga piniriso sa pagsiguro nga walay makahilabot niini nga kabanay sa biktima.

Kagahapon sa udto ang inahan sa biktima ug si Esguerra nag-atubang didto sa buhatan sa Investigation and Detective Management Branch (IDMB) ni Chief Insp. Bonifacio Garciano.

Matud ni Buenafe nga iyang gipaimbestigar ang maong pasangil aron masuta kun tinuod ba nga gihatagan og special treatment si        Dacillo.

Samtang iya usab gipadayag nga kun makig-estorya kaniya ang pamilya sa biktima andam siya niini, matud pa ni Buenafe.

Mahinumdoman nga sa miaging semana nagpaingon ang biktima sa tindahan sa suspetsado kay may paliton kini dihang giingong gipusil kini patay sa naulahi.(/WC)  (BANATNEWS)