Alvin mosuporta ni Mike

CEBU, Philippines - Si Mayor Michael Rama nakigkumboya kang kanhi Mayor Alvin Garcia alang sa   beautification project sa mga baywalk ning Siyudad sa Sugbo.

Matud pa sa mayor nga si Garcia maoy iyang nahuna-hunaan nga mangulo sa grupo nga mopatahom sa daplin sa kadagatan sa dakbayan kay nakaumol na kini og plano sa dihang kini pa ang mayor sa Siyudad sa Sugbo.

Nasayran nga sa iyang administrasyon wala ikapatuman ni Garcia ang daghan niyang mga plano nga panindoton ang mga baywalk busa gusto ni Rama nga karong panahona ikapatuman kini pinaagi ni Garcia.

Dugang pa ni Rama nga ubay-ubay na nga mga proyekto ang iyang nasugdan pinaagi sa pakigkombuya niya sa pribadong mga tawo.

Sa pagkakaron giisip na ni Rama nga usa na ka pribadong tawo si Garcia    kay wala naman kini plano nga mobalik pa sa politika.

Matud pa sa mayor nga si Garcia makatabang sa pagpalambo sa turismo ning dakbayan kung matuman ang mga plano niini nga panindoton ang mga baybayon sa Siyudad sa Sugbo ilabi na kun kataoran kini og mga sugang dagitabnon ang matag eskina.

Sumala pa ni Rama nga aduna gyu’y mga sakop sa kapolisan nga idestino sa mga baywalk aron luwas kini nga suroyan sa publiko adlaw ug gabii.(/WC)(BANAT NEWS)