Masaker sa aklan 5 patay

CEBU, Philippines - Usa ka 25-anyos nga giingong may deperensya sa pangisip ang mitagod-tagod sa unom ka mga tawong nangatulog sa usa ka panimalay kagahapon sa kaadlawon diha sa Brgy. Bulwang, Numancia, Aklan.

Lima sa mga biktima ang namatay samtang ang usa pabiling giatiman ug talandugon ang kahimtang diha sa intensive care unit sa Dr. Rafael S. Tumbukon Memorial Hospital sa Kalibo, Aklan.

Sumala pa ni Inspector Benjo Clarete, Numancia police chief, ang mga namatay dihadiha mao sila si Anunsacion Rivas, 92; Luciano Rivas, 94; Baltazar Rivas, 52; ug Salvacion Rivas, 84.

Samtang si Felicidad Rivas gideklarar nga namatay usab diha sa usa ka tambalanan ug pabiling nakigkombate sa kamatayon ang ikaunom nga biktima nga si Rosa Rivas, 65.

Nasuta nga ang magtiayong sila si Anunsacion ug Luciano mga apohan sa suspek nga si Errol Roldan, 25, kinsa giingong gikan pang gimaymayan sa amahan sa ilang balay dili layo sa panimalay sa mga biktima.

 “His father claimed to be surprised when he learned about the hacking incident,” matud pang Clarete.

Sumala pa nga unang gisulod sa suspek ang balay nila Baltazar, Anunsacion ug Rosa ug human sila panigbasa misulod kini sa pikas balay gibanabanang 40-metros ang gilay-on ug gitigbas usab ang laing tulo ka biktima.

Ang suspek nadakpan ra hinuon dayon human sa insidente ug nag-inusarang gipaslak sa usa ka karsel sa Numancia Police Station.

Sumala pa sa kapolisan bisan paman sa pangangkon ug pagdudang adunay kakulian sa pangisip ang suspek ilaha gihapon kining pasakaan og sumbong nga parricide, multiple murder, ug frustrated murder.

Nasuta usab nga gialarma na kaniadto ang suspek sa maong lugar ug gikatahong padayong nagpatambal sa usa ka mental facility sa Pototan, Iloilo ug gipangangkon sa amahan niini nga naarang-arang na unta ang sakit niini sa wala pa ang krimen. (BANATNEWS)