Upat gilumsan sa okoy

CEBU, Philippines - Upat ka batan-on dungang nakabsan sa kinabuhi human sila malumos kay gituohang gi-okoy sa kadagatan sa barangay Dumlog, dakbayan sa Toledo kagahapon sa alas 11:00 sa buntag.

Ang mga biktima mao ang manag-agaw nga sila si Mae Morata Areate, 16, Dindo Marata Blanco, 14, Joseph Tukib Blanco, 14 ug ang ilang silingan nga si Jason Gabiano Asuzwnas, 14, pulos molupyo sa sitio Sipanay, barangay Luray 2 sa maong syudad.

Sa pakighinabi sa Banat News kang Gertrudes, inahan ni Dindo Blanco kini mibutyag nga pito ka mga batan-on ang nagkuyog ngadto sa dagat uban sa kapuyo sa iyang amahan nga si Luzviminda.

Sa pag-abot nila   sa dagat giingong ang mga bata mikuyog pa kini og panginhas ni Luzviminda ug human manguha og sisi giingong mihangyo kini kang Luzviminda nga mangaligo og dagat.

Bisan wala kini tugti ni Luzviminda giingong mipadayon gyud kini sa pagpangaligo sa dagat.

Midugang si Gertrudes nga ang mananagat na   sa maong lugar maoy nakakita sa tulo nga naglutaw nga walay kinabuhi, samtang si Areate padayon pang mikapaykapay sa paglangoy busa gisakwat kini sa mananagat ug dali nga gihatod ngadto sa Toledo District Hospital diin siya ideklarar nga dead on arrival.

Hinuon maayo nalang kay matud pa ni Gertrudes nga ang iyang kinamanghurang anak nga si Paloma, 11, wala mokuyog sa iyang igsuon sa pangaligo ug igo lang kini nga nagtan-aw uban sa iyang mga ig-agaw nga mga manghod ni Areate nga naglangoy-langoy paatubang sa lawom nga bahin sa dagat.

Midugang si Gertrudes nga base sa gibutyag sa iyang anak nga si Paloma nga nakadungog kini nga may dakong tawo nga mikamay   sa upat nga paadtuon sa lawom nga bahin sa dagat nga gituohan ni Gertrudes nga Okoy.

Iyang gibutyag nga ang iyang anak wala mananghid kaniya nga molakaw kay daan na niya kining gidid-an sa pag-adto sa dagat.

Mitug-an usab siya nga peligro kaayo ang lugar nga nalumsan sa upat ka mga bata kay kasagaran sa mga mangaligo didto anaa gyuy mamatay sa pagtuo nila nga may Okoy ang maong dapit.    

Samtang si SPO4 Carmelito Hornales sa Toledo City Police Station mibutyag usab sa Banat News nga base sa ilang nakuha nga impormasyon nga ang gilay-on sa gi-abtan sa upat ka bata gibana-bana gikan sa baybayon nga adunay 100 metros. Gihulagway usab ni Hornales nga posibling nagtinabangay ang upat apan misangpot kini sa pagkalumos.  - BANAT NEWS