Bus operators supak sa fix nga sweldo sa ilang mga drayber

CEBU, Philippines - Magtagbo karong adlawa ang mga bus ug mini bus operators sa Sugbo aron tun-an ang tinguha nga pagsupak sa kamandoan sa Land Transportation Franchising and Regulatory Board (LTFRB) pagpatuman og fix nga suholan sa mga drayber sa pampublikong sakyanan lukop nasud sama sa minimum pay.

Ang presidente sa Cebu Provincial Bus Operator Association (CPBOA) Richard Corominas ug ang presidente sa Cebu South Mini Bus Association nga si Julito Flores nagkasabot nga mohimo sila og pormal nga lakang pagsupak sa maong direktiba.

Plano nilang moduso og pormal nga petisyon ngadto sa korte aron kapugngan ang pagpatuman sa maong direktiba nga gihulagway nila nga makaapiki nilang mga operators.

Matud ni Flores nakapaapiki nilang mga operators ang maong lakang sa Land Transportation and Franchising Regulatory Board tungod kay gihulagway nilang daan na karun silang nag-antos sa ubos nga kita. Mirason si Flores nga kaniadto pa wala sila makapatuman sa hustong minimum nga pletihan nga gi-aprobahan sa LTFRB tungod usab sa hangyo kaniadto ni Gob. Gwendolyn Garcia sa dili pagpatuman sa dugang gi-aprobahan nga umento sa pletihan.

Nanganti ang duha ka grupo nga mohimo sa tanang legal nga lakang aron babagan ang pagpatuman unya sa kamanduan.

Ang LTFRB nakahukom nga himuong fix ang binuwan nga minimum nga suholan sa mga bus drayber sa publikong sakyanan aron pinahimutang ug dili magdalidali ang mga drayber sa ilang pagpamaneho.

Ang pagkakaskasero sa mga drayber sa mga bus gibasol ngadto sa kompetisyon sa isi’g bus company nga mag-ilogay sa pasahero ug gani kasagaran kanila mag-overloading ug overspeeding aron mokita og dako bisan paman sa disgrasyang posibleng mahitabo. (BANATNEWS)