Nakaeskapo

CEBU, Philippines - Usa ka 16-anyos nga kasamtangang gi-detain diha sa Operation Second Chance (OSC) nga adunay kasong pagpangawat ang misibat kagahapon human sa iyang hearing sa Mandaue City Hall of Justice.

Gawas sa 16-anyos aduna usab laing duha ka mga kauban niini ang misuway unta sa pag-ikyas apan nasikop ra usab ang usa niini.

Matud pa ni Insp. Merlinda Metante, OSC warden nga miikyas ang bata human sa iyang hearing sa Regional Trial Court Branch 55 sa buhatan ni Judge Marilyn Yap pasado alas-10 sa buntag kagahapon.

Midugang si Metante nga nasulod sa OSC ang batan-on niadtong buwan sa Septiyembre sa miaging tuig ug gikatakdang hatagan na unta kini og parole karung buwana.

“Sayang kaayo nga miikyas siya kay he was already set for release,” pasabot pa ni Metante.

Samtang giangkon ni Metante nga adunay sayop sa ilang pagbalhin sa tulo ka batan-on tungod kay ang protocol unta mao nga usa ka jail guard sa matag usa ka bata ug laing usa maoy bodyguard.

Apan ang maong protocol wala masunod sa diha nga nahitabo ang pag-ikyas sa batan-on. “Wala mi nag-expect nga naay court hearing, mao nga nag-operation greyhound mi but miabot man ang sakyanan sa court,” pasabot pa ni Metante. Gipaabot nga adunay imbestigasyong himuon kalabot sa maong pag-eskapo.

Aduna nay gihimong koordinasyon ang OSC sa lokal nga opisyales sa barangay Pulpugan lungsod sa Consolacion diin magpuyo ang maong batan-on.(Uban sa report ni Ryan Sorote, The Freeman/EIM  - BANAT NEWS