Devotee City buksan sa Enero 12

CEBU, Philippines - Andam na ang temporaryong kapuy-an sa mga debotos ni Senyor Sto.Niño nga giandam sa siyudad nga mao ang Devotee City diha sa kilid sa karaang Compaña Maritima Building ning dakbayan sumala pang Konsehal Roberto Cabarrubias.

Ang Devotee City maoy himuong temporaryong kapuy-an sa mga debotos ni Señor Sto. Niño gikan sa nagkalainlaing dapit sa probinsya nga mamista sa dakbayan sa Sugbo apan walay kaabtan dinhi.

Nagkanayon si Cabarrubias nga mao usab ang chairman sa Devotee City nga buksan kini sugod karong Enero 12. Ang Devotee City adunay kapin sa 100 ka container vans.

Migahin ang siyudad og P950,000 alang sa pagpatukod sa Devotee City ug mapasalamaton usab siya gumikan kay dunay mga pribadong kompanya nga mihatag usab og donasyon alang sa maong programa.

Ang mga mamistahay nga gustong mopuyo niini gikinahanglan nga makapresentar og mga dokumento nga makapamatuod nga gikan gyud sila sa laing dapit, kini sama sa ID, ticket sa barko ug bus.

Moabot ngadto sa 2 mil ngadto sa 3 mil ka mga tawo ang makapahimulos niini ug gipatuman nila ang polisiya nga “first come, first serve.”

Ang Metro Cebu Water District (MCWD) maoy moayuda sa tubig sa maong proyekto ug ang Visayas Electric Company (VECO) maoy moabaga sa kuryente. (BANATNEWS)